ရခိုင်ပြည် စစ်တွေမြို့မှာ ရခိုင်ရိုးရာအစိုင်လာ ရထားဆွဲပွဲ ကို နက်ဖန်ခါ ကျင်းပလားဖို့လို့သိရပါရေ။ ယင်းရထားဆွဲ ပွဲရေ ဒေနှစ်နက်ဆို (၄) နှစ်မြောက်လို့သိရပါရေ။ စစ်တွေမြို့ အထင်ကရကွင်းတကွင်းဖြိုက်တေ ဝင်္ကဘာ ကွင်းမှာ အလှည့်ကျရေ ရွာကြီးတောင်ရပ်ကွက်က ဦးစီးဦးဆောင် ကျင်းပလားဖို့လို့လေးဝတီက သတင်းရ ဟိပါရေ။ အယင်နှစ်က မိဇံမှာ ကျလားခရေ ရထားဆွဲပွဲထက် စည်ဖို့လို့လည်း ပြောကတ်ပါယင့်။ စစ်တွေမြို့ရထားဆွဲပွဲအကြောင်းကို စစ်တွေမြို့က ရခိုင်စတူဒီယိုနန့် ရခိုင် Hip Hop ကို လမ်းသစ်ဖေါက်ခရေ အဆိုတော် ကိုတူတူ ကို မိန်းကြည့်ရေအခါ ကိုတူတူက " ဟုတ်ပါရေအကိုး၊ ဒေနှစ်ခါတော့ခါ အယင်နှစ်ကထက် စည်ပါဖို့၊ လူငယ်ချေတိကလည် အားကြိုးမာန်တက် ပါဝင်ကတ်ပါဖို့။ ကောင်းအားတက်နိန်ကတ်ပါရေ။ ဒေသအာဏာပိုင်တိဘားကလည်း ခွင့်ပြုချက် ရထားပါဗျယ်။ စစ်တွေအစိုင်အလာက အယင်ကခါ မိဇံက သုံးနှစ် တာဝန်ယူပြီးကေ မိဇံမှာ ချခပါရေ။ နေရာတိုင်း ရပ်ကွက်တိုင်းမှာ ချစော်ပါ။ ဒေနှစ်ခါတော ရွာကြီးတောင်အလှည့်ကျပါရေ။ ဝင်္ကဘာကွင်းမှာဆိုကေ ကွင်းလည်းကျယ်ရေအတွက် ပွဲချစော် အဆင်ပြေပြီးကေ လူစည်ဖို့လို့ထင်ပါရေ။" လို့ လေးဝတီကို ပြောပါရေ။ရခိုင်ရိုးရာအစိုင်အလာ ရထားဆွဲပွဲစော် တိမ်မြုပ်နိန်စော် ကြာပါဗျယ်။ ရခိုင်ပြည်မောင်တော မှာတော့ ခါ နှစ်စိုင်နှစ်တိုင်း ဒေတပို့တွဲလကို ရောက်ကေ ရထားဆွဲပွဲကို ကျင်းပပါရေ။
....................
လေးဝတီ - လွတ်လပ်တေ ရခိုင်သတင်းဌာန