လွန်ခရေ ဆယ်စုနှစ်ချေနှစ်စုလောက်က ဖြစ်ချင်ရေဆန္ဒ ဖြတ်သန်းလားချင်ရေဘ၀နန့်  အနာဂတ်အိမ်မက်ချေတခုကို ချပြခဖူးပါရေ။တိုင်ပင်ခဖူးပါရေ။ထုတ်ဖော် ခဖူးပါရေ။ ယေကေလေ့ အေပိုင်ဖွင့်ဟပြောပြလိုက်ခြင်းကို တုန့် ပြန်ပါ လတ်ကတ်တေ စကားလုံးတိက လီပြင်းမုန်းတိုင်း ပင်လယ်လှိုင်းနန့်  အရိုင်းတေးခြင်းသံတိပိုင် ဟာမိုနီမဖြစ် တဖက်သတ် စစ်ကြေငြာခြင်းခံ ရပနာ အတိုက် ခိုက် ခံ လိုက် ရစွာထက်ဆိုးနိန် ပါရေ။
သရော်ရေလီသံ ၊ အထင်သေး ခြင်းမိတ်ကပ်တိလူးထားရေအကြည့်၊ နှိမ့်ချစော်ကားခြင်းတိပြည့်နိန်ရေသရော်ပြုံးတိက စစ်မြီပြင်ထဲမှာဖြတ်သန်းလား နိန်ရေ ကျည်ဆံတိပိုင် ဒေါင့်ပေါင်းစုံက ဦးတည်တိုက်ခိုက်ပါလတ်ကတ် ပါသိမ့်ရေ။ အေသူရို့  အားလုံး၏ အဓိက အကြောင်းပြချက်က မဖြစ်နိုင်ခြင်းဆိုရေ ပုံသီကားချပ် ဆင်ခြီတခုနန့်  ဒေအလုပ်ကိုလုပ်ကေ ၀မ်းမ၀မွဲပြာကျပနာ အငတ်ဘုံဆိုက်လားဖို့ ဆိုရေ ဆရာကြီးအထာနန့် ဆုံးမသံတိဖြစ်နိန် ပါရေ။
ရခိုင်သားချေတစ်ယောက်က ရခိုင်ကလောင်တံကိုထမ်းပြီးကေ ရခိုင်စာကိုရွီးလို့  ရခိုင်စာရွီးဆရာဘ၀ကို ပုံဖော် ပိုင်ဆိုင် ဖို့ ကြိုးစားအားထုတ်မိခြင်းရေ အပြစ်ကြီးတစ်ခုကို ကျူးလွန်မိရေပိုင် လောကပတ် ၀န်းကျင် က အကြည့်စိမ်းတိနန့် ကြည့်ခြင်းကို ခံခရပါရေ။ ယေကေလေ့ အမဲရောင်ဆီးဆိုးထားရေ အမှောင်ခန်းချေထဲမှာ အလင်းချေတစ ရှာတွိဖို့  စွာခက်တေ လို့ ရာ ကိုယ့်စိတ်ကို ဖြေသိမ့်ပနာ ငါ့အိမ်မက် ငါ့မျှော်လင့်ချက် ငါ့အနာဂတ်စိတ်ကူးတိ အားလုံးကို ငါပိုင်ဆိုင်ရေ ဆိုရေ အားမာန်နန့်  တာထွက်လှမ်းပါလတ်တေ ခြီလှမ်းကို နောက်ပြန်လှည့်ရပ်ပစ်လိုက်ဖို့  တခါချေလေ့စိတ်မကူးခစွာတော့အမှန်ပါ။
ကြုံတွိလာဖို့  ဒုက္ခတိ အဟန့် အတားတိ စိန်ခေါ်မှုတိကို ကြိုက်လို့  စိတ်တန်းခါးကိုဖွင့် ဦးနှောဏ်ကိုရွက်စုံရွှင့်ပနာ နှလုံးသားကထွက်ကျလာရေ ခွန် အားသစ်တိ နန့်  ရက္ခစာပီပန်းတိုင် ဘားကို ရင်နန့် တွားပြီးကေ ပါလတ်ပါရေ။ မျှော်မှန်းထင်ထားခရေပိုင် ရခိုင်စာပီခရီးက ကြမ်းတမ်းပါရေ။ ယေကေလေ့ ဘာသာစကားစာပီရေ လူ့  ယိုင်ကျေးမှု၊ မျိုးဆက်နန့် ချီပနာ မျှဝီထားကတ်တေစုပေါင်းတန်ဖိုး၊ ဓလေ့ထုံးတမ်းစိုင်လာ၊ သမိုင်းအမွီအနှစ်တိ တည်တံ့တည်ဟိနိန်ဖို့  နိန် ရာခင်းပီးထားရေ ဆုံရပ်တခု ဖြစ်နိန်စွာကို နားလည်လို့  ယေပြီးကေ လူမျိုးတမျိုး၏ဂုဏ်သိက္ခာ၊ လူ့ အဖွဲ့  အစည်း၏အဆင့်အတန်း၊ လူတစ်ဦးတစ်ယောက်ချင်းစီ၏ဘ၀၊ လူတိုင်း၏မွီးရာပါအခွင့်အရေးတိကိုလေ့ ဘာသာစကားစာပီနန့် ရာ တိုင်းတာကြည့်ကတ်စွာကို သိထားလို့  စိတ်ပျက်ခြင်းတိကိုဖယ်ပနာ ရခိုင်လူ့ ဘောင်၏လိုအပ်ချက်ကို ဖြည့်ပီးဖို့  ဒယောကိုနှနောင်းကျိတ်ပြီးကေ ပါလတ်ပါရေ။
ဘာသာစကားစာပီရေ လူ့ ဘောင်ကို တစုတစည်းတည်းဖြစ်နိန်အောင် ဆီမန်းပိုင်ဆက်စပ် ချိုင်ပီးထားပြီးကေ လူတိ ဖွံ့ ဖြိုးတိုးတက် အောင်မြင်ကြီးပွါးလာအောင်လေ့ လုပ်ဆောင်ပီးရေ ဆိုစွာကို နားလည်လက်ခံထားကတ်တေ မျိုးဆက်သစ်ချေတိ ကိုပါ တွိလာမြင်လာရရေခါ စာပီတာဝန်ကိုထမ်းဆောင်လားဖို့  ပိုလို့ စိတ်ဓါတ်တက်ကြွပါ လတ်ပါရေ။ ကျွန်တော်ရို့  ဇာတိစိုင်းစားနိန်ကတ်လေ ကျွန်တော်ရို့  စွာ ဇာချင့်လဲ ဆိုစွာကို နားလည်ဖို့  ဘာသာစကားစာပီက မှန်တစ်ချပ်ပိုင်ထောင်ပြပနာ လမ်းညွှန်ပြပီးပြီးကေ စိတ်ဦးနှောဏ် ကို ပိတ်ထားရေ လက်ခုပ်သီးတိကို ဖွင့်နိုင်ရေသော့လေ့ ဖြစ်တေလို့  ယုံကြည်ထားကတ်တေ စာရွီးဖော်စာရွီးဖက်ချေတိနန့် လက်တွဲ လာရရေခါ ငါတစ်ယောက်တည်းအထီးကျန်မဟုတ်ဆိုရေ ခံစားမှုနန့်  အားပြည့်ပါလတ် ပါရေ။
အမိအဖကိုမြတ်နိုး ဘ၀ကိုတန်ဖိုးထား အနာဂတ်ကိုပါအလှဆင်လားဖို့ စိတ်ကူးထားကတ်တေ လူတိအတွက် အမင်နန့် ခိုင်းနှိုင်း အသက်သွီးနန့် တတန်းတည်းထားရေ စာပီက ပစ်ပယ်ချန်ထားလို့  တခုပိုင်လေ့ မရရေ ဖြစ်တည်ခြင်း ၏လိုအပ်ချက် လမ်းပြကြယ်လေ့ ဖြစ်ပါရေ။ ယေကေလေ့ ဖိနှိပ်မှုတိ ဖျက်ဆီးခံ နိန် ရခြင်းတိကြားက ပြန်ပနာ အနုချေ ထွက်လာဖို့ ကြိုးစား အားထုတ်နိန်ရရေ ရခိုင်ဘာသာစကားစာပီလောကရေ အခကြေးငွေ စီးပွါးဖဲသာ အမြတ်အစွန်း ရှာရေ တထပ်စာအမြင်နန့်  လူတိအတွက် ဈီးကွက်ကောင်းတခု ဖြစ် မနိန်စွာက မျက်မှောက် ကာလအခင်းအကျင်းထဲက အမှန်တရားတခု လို့  ပြောရဖို့ ထင်ပါရေ။
ငတ်ခြင်းကိုအဖော်ပြုပနာ မွန်မြတ်စင်ကြယ်သန့် ရှင်းရေပီးဆပ်ခြင်းနန့်  ဘက်ပေါင်းစုံကအောက်ကျနောက်ကျဖြစ်နိန် ရရေ ရခိုင်လူ့ အဖွဲ့ အစည်းနန့်  ဒေလူ့ ဘောင်၏အသွီးအသက်ဖြစ်တေ ဘာသာစကားစာပီကို ကယ်တင်ဖို့  ကြိုးစားခြင်းရေ ကြီးမြတ်တေသမိုင်းပီးတာဝန်ကို ထမ်းဆောင်ခြင်းဖြစ်တေပိုင် ရခိုင်ဖြစ်ခြင်း၏ကျေးဇူးကို ဆပ်ခြင်းလေ့ဖြစ်တေလို့ ခံယူထားကတ်တေ ရခိုင်မျိုးဆက်သစ်ချေတိအတွက်က စာပီအလုပ်ကိုလုပ်ခြင်းရေ တသက်စာအမြင်နန့် တန်ဖိုးမဖြတ်နိုင်ရေအကျိုးအမြတ်ရလာဖို့  ရင်းနှီးမြှပ်နှံခြင်း ဖြစ်ပါရေ။
ရခိုင်သားက ရခိုင်စာကိုရွီးခြင်းရေ စီးပွါးရေးတွက်ခြီကိုက်ပနာ ချမ်းသာကြီးပွါးလာနိုင်ခွင့်နန့်  ပုဂ္ဂလိကဘ၀တက်လမ်း အတွက်အာမခံချက်မပီးနိုင်ကေလေ့ လူ့ အဖွဲ့ အစည်းအသက်ဆက်လမ်းအတွက် အုတ်တချပ်သဲတပွင့်ခင်းပီးရေ အမွန်မြတ်ဆုံး တန်ဖိုးအဟိဆုံးလူသားရို့  ၏လုပ်ဆောင်ချက် ဖြစ်ပါရေ။ ငတ်လီဘတ်စီ အခါတရာ ယုံကြည်မှုကခိုင်မာလို့  ရခိုင်သားရခိုင်သမက ရခိုင်ကလောင်တံကိုကိုင်ပနာ ရခိုင်စာကိုရွီးပြီးကေ ရခိုင်ရို့ လူ့  ဘောင်ကို အသိဥာဏ်နန့် အလှဆင်နိန်ကတ်တေ ငတ်ဖော်ငတ်ဖက်ချေတိကို တွိလာရရေခါ ရင်ထဲမှာ ပီတိအဖြာဖြာ ဖြစ်မိပါရေ။
ကိုယ့်ရင်ဖတ်ထဲကခံစားချက်ကို ကိုယ်တိုင်ဖွင့် ဖတ်ပြီးကေ ကိုယ့်ဂုဏ်သိက္ခာ ကို ယ့် ၀ိဥာဉ် ကိုယ့်လိပ်ပြာကို ကိုယ်တိုင်အသိအမှတ်ပြုပနာ ကိုယ့်စံ ကိုယ့်မာန် နန့်  ကိုယ့်ဟန်ကို စိုက်ထူလို့  ရခိုင်စွာ ဇာပိုင်ယိုင်ကျေးမှုမြင့်မားရေ လူမျိုးလဲ ဆိုစွာကို အဓိပ္ပါယ်ပြန်ဖွင့်ပြဖို့  ဒုက္ခဆင်းရဲခြင်းတိကြားက သစ္စာမာနနန့်  ရက္ခစာပီလမ်းမထက်မှာ ခြီလှမ်းလားနိန်ကတ်တေ ငတ်ဖော်ငတ်ဖက်ချေတိ အတွက် မိုးထရောင်နီက ဖြူစင် ၀င်းပလင်းလက်လို့  ကြိုဆိုနိန်ဖို့ စွာက ကျိန်းသီနိန်ပါရေ။ ။ ။
ခိုင်အောင်အောင်
၎၊၉၊၂၀၁၁