ရခိုင်ဘုရင့်နိုင်ငံမျိုးဆက်များအသင်း (A.R.K.G- Association of Rakhine Kingdom's Generation) ကို ထိုင်းနိုင်ငံ တာ့ခ် ခရိုင်၊ မဲဆောက်မြို့၊ မေကု ရှိ ရွှေသဇင် စာသင်ကျောင်းတွင် ဖွင့်ပွဲအခမ်းအနားတရပ်ကို ၂၀၁၂-ဖေဖေါ်ဝါရီလ ၁၁-ရက်နိန့်မှာ ကျင်းပပြုလုပ်လားရေ လို့ လေးဝတီက သတင်းရရှိပါရေ။ ယင်းအခမ်းအနားကို ထိုင်းနိုင်ငံမဲဆောက်အခြေစိုက် ရခိုင်နိုင်ငံရေး အင်အားစု၊ တော်လှန်ရေးအင်အားစု၊ ရခိုင်လူမှုရေးအဖွဲ့ စရေအဖွဲ့တိက ကိုယ်စားလှယ်တိနန့် မဲဆောက်ရောက်ရခိုင်အလုပ်သမားတိ အားလုံးစုစုပေါင်း ၁၀၀ နီးပါးတက်ရောက်ခပါရေ။ အခမ်းအနားမှူးအဖြစ် ခိုင်စိုး (A.R.K.G အထွေထွေအတွင်းရေးမှူး-၂) နှင့် အေးအေးခိုင် (A.R.K.G စရင်းစစ်) ရို့က တာဝန်ယူဆောင် ရွက်ပြီးကေ သဘာပတိအဖြစ်- A.R.K.G နာယက ဦးကောဝိဓ (ရွှေသဇင် စာသင်ကျောင်း တာဝန်ခံ)၊ ရခိုင်ပြည်လွတ်မြောက်ရေးပါတီ (A.L.P) ဒု-ဥက္ကဌ ခိုင်စိုးနိုင်အောင်၊ ရခိုင့်မျိုးချစ်အင်အားစု (A.P.F)မှ ခိုင် လင်းအောင် နန့် ဦးရက္ခိတဝံသမှ ဆောင်ရွက်ပီးကတ်ပါရေ။A.R.K.G အသင်းရည်ရွည်ချက်တိ လုပ်ဆောင်ချက် တိကို A.R.K.G အသင်း အထွေထွေအတွင်းရေးမှူး ခိုင်ဝင်းလှိုင်ကို လေးဝတီက မိန်းမြန်းရေအခါ ခိုင်ဝင်းလှိုင်က "ကျွန်နော်ရို့ ဒေ A.R.K.G ရခိုင်ဘုရင့်နိုင်ငံမျိုးဆက်များအသင်းရေ ၂၀၁၁ခုနှစ် အောက်တိုဘာလ ၈ ရက် နိန့်မှာ ရခိုင်ပြည်သူထဲက ပြည်သူ့ကိုယ်စား သန္ဓေပေါက်ဖွားလာရေ အဖွဲ့အစည်းတစ်ခုဖြိုက်ပါရေ။ ဒေနိန့် ရခိုင်ပြည်သူ လူထုတိခံစားနိန်ရရေ လူနိန်မှုဘဝတကို ငဲ့ညှာထောက်ထားပြီးကေ တဖက်တလမ်းက
ကူညီစောင့်ရှောက်နိုင်ဖို့အတွက် ဒေအဖွဲ့အစည်းကို စလို့ တည်ထောင်ရစော်ဖြိုက်ပါရေ။ ရခိုင်လူမျိုးတိ အယင် က ကိုယ့်ထီးကိုယ့်နန်းနန့် နိန်ခကေလည်း ဒေဂနိန့် သူများတိုင်းပြည်မှာ ကျွန်ဘဝရောက်ပြီးကေ ကျွန်ခံရေပိုင် အလုပ်လုပ်နိန်ကတ်ပါရေ။ ဇာနိန်ရာ ဇာဒေသကိုပင်ရောက်ရောက် ရခိုင်ဆိုစော် အယင်က ကိုယ့်ထီးကိုယ့်နန်း နန့် နိန်ထိုင်ခကတ်တေ၊ ကိုယ်ပိုင်စာပီ ယိုင်ကျေးမှူတိထွန်းကားခရေ၊ အမျိုးသီလ နှစ်ဌာန ကို စောင့်ထိန်းခကတ်တေ လူမျိုးဖြိုက်တေဆိုကြောင်း ဇာတိသွီး ဇာတိမာန်ကို ဖေါ်ထုတ်ပြသပြီးကေ မိမိကိုယ်ကို မိမိ စိတ်ပျက်အားငယ်နိန်ဖို့အစား ရာဇသွီး၊ ရာဇမာန်တိနန့် အဖရခိုင်ပြည် ပြန်လည်ရရှိဖို့စော်မှာ တဖက် တလမ်းက ကျရာနေရာက တာဝန်ထမ်းဆောင်လားပါဖို့။ အဂုလောလောဆယ်တော့ခါ မဲဆောက်မှာ ဟိရေ ရခိုင်အလုပ်သမားတိကိုရာ အခြေခံပြီးကေ ဖွဲ့စည်းထားပါရေ။ နောက်ပြည်ထဲမှာသော်လည်းကောင်း နိုင်ငံ တကာမှာသော်လည်းကောင်း အဖွဲ့တိကို ကျယ်ကျယ်ပြန့်ပြန့်နန့် လုပ်ဆောင်လားဖို့ အဖွဲ့အစည်းမူမှာဟိ ပါရေ။" လို့လေးဝတီကို ပြောပါရေ။ဒေ A.R.K.G ရခိုင့်ဘုရင့်နိုင်ငံမျိုးဆက်အသင်းရေ ရခိုင်ပြည်လွတ်မြောက်ရေး ဂုဏ်ထူးဆောင်ဗဟိုကော်မတီဝင် ဗိုလ်ခိုင်နီလင်း မကွယ်လွန်ခင် မျိုးစိချ လမ်းပြ အသက်သွင်းပီးခရေ အဖွဲ့အစည်းတစ်ခုဖြိုက်ပါရေ။ မူဝါဒဆိုင်ရာ၊ အဖွဲ့အစည်းစည်းမျဉ်းစည်းကမ်းဆိုင်ရာတိနန့် စနစ်တကျ ခိုင်ခိုင်မာမာ ဖွဲ့စည်းထားရေ အဖွဲ့အစည်းလည်းဖြိုက် ပါရေ။