ရခိုင်အကြောင်းတစ်စေ့တစ်စောင်း

လူမျိုးတမျိုးမှာ ဘာသာစကားစာပီပျောက်ကွယ်လားနိန်ခြင်းရေ ယင်းလူမျိုး နိဂုံးချူပ်ဇာတ်သိမ်းမျိုးပြုန်းမျိုးတုံးလားဖို့ အတွက် သီဒဏ်အချခံထားရစွာနန့် တူနိန်ရေ။ ဘာသာစကားစာပီပျောက်စွာနန့်  လူမျိုးတမျိုးဖြစ်ပေါ်လာရေ ယိုင်ကျေးမှု ( Civilization) လေ့ ရပ်လားတတ်တေ။ နိုင်ငံရေး၊ လူမှုရေး၊ ဘာသာရေး၊ အနုပညာ၊ သမိုင်း၊ ဆီးပညာ တိ အားလုံးစွာ ဘာသာစကားစာပီမှာ အခြီခံထားစွာ ဖြစ်လို့  ဘာသာစကားစာပီစွာ လူ့ အဖွဲ့ အစည်းတိုင်းပြည်နိုင်ငံတိ၏အသက်လို့  ကမ္ဘာ့နိုင်ငံရေးသိပ္ပံပညာသျှင်တိ အားလုံးက လက်ခံထားကတ်တေ။

ရခိုင်ပြည်မှာ ၀တီလေးရပ်ဟိစွာကို ရခိုင်သားတိုင်းသိကတ်တေ။ ဒေ လေးဝတီမှာ နိန်ထိုင်ကတ်တေ ရခိုင်သားတိ စကားပြောကတ်တေခါ လီသံကွဲကတ်စွာကိုလေ့ ရခိုင်သားရခိုင်သမတိုင်းက သိရေ။ ယေကေလေ့ ရခိုင်ရို့ သမိုင်းမှာ တရားဝင်ရခိုင်နိုင်ငံသုံးဘာသာစကားစွာ တခုတည်းရာ ဟိခရေ။ အေ တမျိုးတည်းကို ရခိုင်ပြည်သားအားလုံးက နားလည်ရေ လက်ခံကျင့်သုံးခကတ်တေ။ အဂုလေ့ ကျင့်သုံးနိန်ကတ်တေ။

နိန်ရာဒေသနန့် လိုက်ပနာ လီသံ (Dialect) ကွဲခြင်းရေ ကမ္ဘာ့နိုင်ငံတိုင်းပြည်တိုင်းမှာ တွိကတ်ရရေ။ အင်္ဂလန်မှာ လန်ဒန်က အင်္ဂလိပ်တိစကားပြောစွာနန့်  လီဗာပူးက အင်္ဂလိပ်တိစကားပြောစွာ လီသံမတူကတ်ပါ။ ဂျာမဏီနိုင်ငံမှာလေ့ ယင်းပိုင်ဗျာယ်။ BMW ကားထုတ်တေ Bayern (Bavaria) ပြည်နယ်က ဂျာမန်တိ
နန့်  ဘာလင် (Berlin) က ဂျာမန်တိ စကားပြောကတ်တေခါ လီသံကွာကတ်ပါရေ။ ယေကေလေ့ ဂျာမဏီမှာ ဂျာမန်ဘာသာစကားစွာ တမျိုးတည်းရာဟိရေ။

ဂျာမဏီမှာနိန်ရေ ရန်ကုန်မှာမွီးပြီးကေ ရန်ကုန်မှာကြီးရေ ရခိုင်ပညာတတ် တက္ကသိုလ်ဆရာတယောက်က ကျွန်တော်ကို ပြောဖူးရေ။ ဗမာပြည်နန့် နီးရေ တောင်ပိုင်းက ရခိုင်သားတိစွာ အဂုကျွန်တော်ရို့ ရွီးနိန်ကတ်တေ ခေတ်သစ်ရခိုင်စာပီကို လက်ခံကျင့်သုံးဖို့  အခက်အခဲဟိရေလို့  ဆင်ခြီပီးဖူးရေ။ ဒေ ပညာတတ်ကြီးက ဂျာမန်ဘာသာစကားကို ဂျာမန်တယောက်ပိုင် ပြောတတ်ရွီးတတ်တေ။ ယင်းအတွက်နန့်  သူ့ ကို ကျွန်တော်က ပြန်ပြောလိုက်တေ။ “ရခိုင်ဘာသာစကားကို သင်ယူပြောဆိုကျင့်သုံးဖို့  ရခိုင်ဆိုရေ စိတ်ဓါတ်က အဓိကကျပါရေ။ ဘ၀မှာ တခါလေ့ မရင်းနှီးမကျွမ်းဝင်နီးစပ်မှုမဟိရေ ဥရောပတိုက်က ဂျာမန်ဘာသာစကားနန့် စာကိုတောင် သင်
လို့ တတ်ကေ ဇာဖြစ်လို့ ကိုယ့်မိခင်ဘာသာစကားနန့် စာကို မတတ်ရလဲ။ ကိုယ်အမင်ဘာသာစကားနန့် စာကို သင်ဖို့ က ပိုလို့ လွယ်ကူရေပိုင် မင်္ဂလာတပါးလေ့ ဖြစ်တေ။ ပဇက ဗမာစကားပြောနိန်ဘတ်စီ။ သွီးထဲမှာ ရခိုင်ဆိုရေ စိတ်ဓါတ် ဟိကေ အဂုခေတ်ရခိုင်စာကို သင်ဖို့ လွယ်ကူရေ။ ရခိုင်တေးခြင်းတိကို နားထောင် ရခိုင်ကဗျာ ဆောင်းပါး ၀ထုတိကို ဖတ်လို့ ရပါရေ” တိုက်တွန်းလိုက်တေ။

အဂုဆိုကေ အနောက်ဥရောပနိုင်ငံတိဖြစ်တေ ဂျာမဏီ၊ နယ်သာလန်ရို့ မှာ ဘာသာစကားနန့် ပတ်သက်တေ ဥပဒေတိချမှတ်ထားရေ။ နယ်သာလန်နိုင်ငံမှာ သူရို့ လူမျိုး ဒတ်ခ်ျအမိအဖက မွီးလာဘတ်စီ။ ဒတ်ခ်ျ (Dutch) စာကို သတ်မှတ်ထားရေ အဆင့်ထိ မရွီးတတ်ကေ မပြောတတ်ကေ နယ်သာလန်နိုင်ငံသား မပီးပါ။ တချို့  တောင်အာဖရိကနိုင်ငံမှာ မွီးကတ်ကြီးကတ်တေ ဒတ်ခ်ျတိစွာ နယ်သာလန်ကို ပြန်လာပြီးကေ နိန်ထိုင်ကတ်တေခါ ဘာသာစကားကျောင်းတိတက်ကတ်ရပြီးကေ စာမေးပွဲတိ ဖြေကတ်ရရေ။ အောင်ခါမှရာ သတ်မှတ်ထားရေ အဆင့်မှီခါမှရာ နိုင်ငံသားဖြစ်ခွင့်ပီးရေ။

ခေတ်သစ်ရခိုင်ရို့ စာပီလှုပ်ယှားမှုတိ စတင်လာကတ်တေခါ ကြုံတွိလာကတ်ရရေ မိန်းခွန်းတခု (၀ါ) ဆင်ခြီတခုက “ရခိုင်စာပီလှုပ်ယှားမှုကို အိန်တာနတ်ထက်မှာ လုပ်လို့ ထိရောက်မှုဟိဖို့ မဟုတ်ဆိုရေ” စကားပင် ဖြစ်တေ။ အိုင်တီတော်လှန်ရေး
နန့် ကွန်ပြူတာနည်းပညာတိုးတက်လွန်ခေတ်မှာ e-book, e-journal, e-newspaper, e-library, e-learning, e-commerce တိလုပ်ပြီးကေ အိန်တာနတ်ကမ္ဘာရွာဖြစ်နိန်ရေအချိန်မှာ ရခိုင်သားတိအိန်တာနတ်ထက်မှာ စာပီလှုပ်ယှားမှုလုပ်ခြင်းရေ ခေတ်မှီပြီးကေ ထိရောက်မှုဟိရေ အကျိုးဟိရေ အလုပ်ကိုလုပ်ခြင်းပင် ဖြစ်တေ။ ဥပမာပီးရဖို့ ဆိုကေ ရခိုင်သားတယောက် ဇာနိုင်ငံမှာပင်နိန်နိန် အိန်တာနတ်ကို ဖွင့်ပနာ ကွန်ပြူတာရှိမှာ ရခိုင်ကဗျာ စာတိကို ဖတ်လာနိုင်ခြင်းရေ အယင်ကမရဖူးရေ ကြီးမားရေအကျိုးကျေးဇူးရလဒ်တခုပင် ဖြစ်ပါရေ။ ရခိုင်သားတိကြားမှာ အိန်တာနတ်သုံးစွဲမှုနည်းနိန်သိမ့်ကေလေ့ လက်ဟိသုံးစွဲနိန်ကတ်တေ ရခိုင်သားရခိုင်သမတိက ရခိုင်ပိုင် ဘလော့ဂ်တိ၊ ၀ပ်ဆိုက်တိ၊ အိန်တာနတ်ရေဒီယိုတိ အများကြီးလုပ်လားကတ်ရပါဖို့ ။ ရခိုင်စာပီလှုပ်ယှားမှုကို အရှိန်မြှင့်လားကတ်ရပါဖို့ ။

နိဂုံးချူပ်ပြောရဖို့ ဆိုကေ ရခိုင်သားရခိုင်သမတိ ရခိုင်စာကို ရွီးပြီးကေ ရခိုင်စာပီလှုပ်ယှားမှုလုပ်ကတ်ခြင်းရေ ကိုယ့်လူမျိုးကို ကျေးဇူးဆပ်ခြင်းဖြစ်တေပိုင် ကိုယ့်လူမျိုးအသက်ကို ကယ်ဆယ်ခြင်းလေ့ ဖြစ်ပါရေ။ ။ ။

ခိုင်အောင်အောင်